Ndabahaye mwiriwe ncuti namwe bakunzi ba radio Inzamba agateka kawe n’ikaze mumakuru twabateguriye kuruyu musi wakabiri igenekerezo rya 18 Ruhuhuma umwaka wi 2025. Aya nayo tuyahera kungingo nkuru nkuru ziyagize.

• Hari abantu babiri baturuka mumuryango umwe baraye bitavye Imana inyuma yo kunywa umuti ngo w’ikirundi. Aha turi k’umutumba wa Kavumu wa muri commune n’intara ya Muyinga. Abajejwe intwaro nabonyene baremeza ayo makuru. Muraza kubikurikira
• Akamaramaza nako karibonekeje kuruyu wa gatanu uheze muri Sentare ya Muha aho muganga christophe Sahabo yahoze arongoye ibitaro Kira hospital yaciriwe urubanza ruteye isoni. Muvyo yaciriwe harimwo gupfungwa imyaka 20 no kunyagwa amatungo yiwe yose. Abakurikirana hafi urwo rubanza rwiwe baratera ivyatsi Sentare nkuru ya Muha yaciye urwo rubanza ngo kuko itubahirije na gato amategeko agenga imanza n’ubwirizwa shingiro.
• Nayo abasirikare bakukurutse bavuga ko ubwanwa bwafutsumunwa kuko bamaze amezi ane barindiriye ko baronswa agashahara kabo ariko amaso yaheze munzira.  Abo bakukuruke basaba bashimitse kuronswa agashahara kabo vuba bwango kuko bari mubuzima bugoye inyuma yo gukorera iguhugu. Kaze mwese mw’ido n’ido ni mukanya.

Ndasubiye kubaramutsa nongera kubaha ikaze

Abantu babiri bo m’umuryango umwe bagizwe n’umwana na Se wiwe baritavye IMANA kuruyu wa mbere k’umutumba Kavumu, zone rugari muri komine n’intara ya Muyinga. Bakaba bahitanywe n’umuti w’ikirundi bari banyoye, nkuko amakuru ava kur’uwo mutumba avyemeza agashimangirwa na musitanteri wa Komine Muyinga. Ido n’ido na Pierre Gahungu.

Arakenuye Pierre Gahungu

Tubandanye aya amakuru mugisata c’ubutungane

Uwahoze ari umushikiranganji wa mbere Alain Guillaume Bunyoni yarankiwe kurekurwa vy’agateganyo yari yasavye Sentare ko amagara yiwe atifashe neza. Iyo ngingo yamenyeshejwe kuruyu wa mbere na Sentare ya gasambura manza yari yashashe mundwi iheze m’urubanza rwa Alain Guillaume Bunyoni. Iyo Sentare isigura ko yasanze ivyo uyo yahoze ari umushikiranganji wambere yasavye bidafise ishingiro. Tubibutse ko Alain Guillaume Bunyoni yaciriwe umunyororo wo gupgungwa ubuzima bwiwe bwose kubera yagiwe n’ivyaha nko gushaka kwica umukuru w’igihugu hamwe no gushaka gutembagaza ubutegezi bwa Varisto Ndayishimiye.

Tukiri murico gisata nyene

Muganga Christophe Sahabo  nawe yahoze arongoye ibitaro Kira Hospital yaraciriwe kuruyu wagatanu na Sentare nkuru ya Muha gufungwa imyaka 20, gutanga amande y’imiliyoni indwi z’amafaranga y’amarundi , gutanga imiliyoni 178 z’amafranga y’amanyabulaya n’ibihumbi umunani n’amajana atandatu z’amadolari y’amerika , hamwe rero no kunyagwa amatungo yiwe yose. Sentare imwagiriza icaha co guhingura impapuro ivyo bita FAUX ET USAGE DE FAUX mu gifaransa. Umushingwamanza Gustave Niyonzima akurikiranira hafi ivyerekeye ugwo rubanza , avuga iyo ngingo yafashwe na sentrare itey’isoni , kuko itubahirije itegeko na rimwe , haba mu butungane cane mw’ibwirizwa nshingiro. Amenyeshako abamuburanira bagiye kwunguruza urubanza. Dukurikire umushingwamanza Gustave Niyonzima.

Radio Inzmba turabandanya amakuru twabateguriye

Leta y’Uburundi ikwiye gukora ibishoka vyose kugira ikingire abarundi mukwirinda ko igihugu cinjiramwo abakoze ihonyabwoko ry’abatutsi mu Rwanda bari mumahari FDLR hamwe n’imisoresore ya Wazalendo yo muri Congo. Bisabwa mw’itangazo ryasohowe kuruyu wa kabiri n’Urunani CB CPI rugizwe n’abarundi bakorana na Sentare mpanavyaha. Ni mugihe murikino gihe hari aba congomani benshi bamaze imisi bariko bahunga ingwano baja mu Burundi. Urwo runani rurasaba leta kubahiriza agateka k’impunzi z’abanyamulenge bamaze igihe bariko barafatwa mu gihugu kandi ataco bazira. Bagasaba n’umushikirizamanza mukuru wa Sentare mpanavyaha gukurikirana ibiriko biraba mu Burundi. Kurikira Jean de Dieu Manirakiza ajejwe kumenyeshamakuru murwo runani.

Amashami nayo  y’ishirahamwe ryishinze kurwanya ihonyabwoko AC Génocide CIRIMOSO akorera hanze y’igihugu, arahagaritswe umutima n’ihagarikwa ry’urutavanako ririko riraba mu ntara zitandukanye rirondera abakiri bato bo mu bwoko bw’abatutsi hamwe n’amajambo yo kubiba urwanko akoreshwa n’abegereye ubutegetsi bivuye ku biriko bibera mu ntara ya Kivu mu gihugu ca Congo. Mw’itangazo ayo mashirahamwe yashize ahabona kuri uyu wa mbere, Emmanuel Nkurunziza umunyamabanga w’ishirahamwe AC Génocide Canada, asaba amakungu gukurikirana ibiriko biraba, agafatira ibihano abo bose bariko barahonyanga uburenganzira bwa kiremwa muntu. Kurikira.

Uyo akaba yari umunyamabanga wa AC Génocide igisata ca Canada

Imbere yo gusozera aya makuru tubabwire ko

Imyidogo ari myinshi mu bakukuruke bahoze mu gisirikare c’Uburundi. Bavuga ko bamaze amezi 4 barindiriye ko boronswa agashahara kabo ariko amaso yaheze mu nzira. Basaba ababijejwe kubatunganiriza kuko bakoreye igihugu , iyi nkuru tuyibaze Pacifique Nshimirimana.

Arakenuye na Pacifique Nshimirimana ni ngaha duciye dusozerera amakuru twariko turabashikiriza, mwakoze mwebwe mwese mwayakurikiye. Bakoze n’abamfashije kuyegeranya. Mugire aho muba mwubahwe. Naho ubutaha.