Turi ku munsi wa kabiri igenekerezo ryambere ukwezi kwa Ndamukiza umwaka w’I 2025, ndabaramukije mwebwe mwese muriko murakurikira radiyo inzamba agateka kawe , kaze muri ano makuru mu Kirundi twabateguriye , nayo akaba agizwe n’ingingo nkuru nkuru zikurikira.

• Hari umugabo ari mu batanga umwavu ugenewe abarimyi b’umuceri bo mu ntara ya Bubanza yaraye ahagaritswe n’igipolisi, akaba yagirizwa kudandaza uwo mwavu mu kinyegero.
• Turakubitira mu ntara ya Muyinga muri zone Munagano neza na neza ku mutumba wa Cibare , aho ubukene bw’umuyagankuba bwugarije abanyagihugu, bavugako badashobora gukora imigambi y’iterambere kubera ubwo bukene.
• Mu gisagara ca Bujumbura hoho , ni igiturire gihabwa abapolisi ku gituro c’amabus kiri ahahoze isiko nkureu ya Bujumbura gisa nicabaye ndanse. Bivugwako uwugize icafumbatisha umupolisi aca ashigwa imbere ku mirongo .

Mu kanya gato, turaja mw’ido n’ido ry’ano makuru.

Ndasubiye kubaramutsa ndabaha n’ikaze murano makuru, umwe mubajejwe gutanga umwavu ugenewe abarimyi b’umuceri mu ntara ya Bubanza yaraye ahagaritswe n’igipolisi mw’ijoro ryakeye. Akaba yahowe gusohora ifumbire abicishije kubo bita aba commissionnaires, kugira aheze ayidandaze. Abo barimyi basabako mu ntwaro n’igipolisi bobandanya bafasha mugukurikirana itangwa ry’ifumbire kugirango bagabanye amanyanga avugwamwo. Inkuru ya Pacifique Nkeshimana.

Pacifique Nkeshimana arakenuye , mu ntara ya Muyinga naho sentare nkuru y’igihugu muri iyo ntara  yaraciriye umunyororo wo gufungwa ubuzima bwiwe bwose umupolisi azwi kwizina rya Anicet Niyonzima avuka mu gacimbiri Muyaga, umutumba Kinyota muri komine Muyinga , yagiriwe n’icaha co kwica umukenyezi wiwe Violette Tuyisenge amunize , Ikiziga ciwe  yagiciye agitekera mw’igunira aca aja kugita ku mutumba Kayenzi  ku birometero 10 yahari hakorewe icaha , mubucagu bwo ku wa 19 Ntwarante uwu mwaka turimwo. Sentare ikaba yategetse  Anicet Niyonzima , kuriha indishi y’akababaro abavyeyi ba Violette Tuyisenge , ingana n’amahera imiliyoni 50.

Muri iyo ntara ya Muyinga nyene , abanyagihugu bo k’umutumba wa Cibare, muri zone Munagano, iri muri komine ya Muyinga baridoga bavugako ko Iterambere kur’uwo mutumba ricumbagira kubera atamuyagankuba bafise. Bamwe muribo bavuga ko bafise imigambi yo kwiteza imbere nko mu muvyerekeye gushinga inganda, kugira ubworozi n’ibindi bikogwa vy’iterambere , ariko badashobora gushika ku ndoto zabo mu gihe batararonka umuyagankuba. Mw’ishirahamwe REGIDESO barizeza abo banyagihugu ko bagiye kubaronsa umuyagankuba mu misi ya vuba. Inkuru ya Eddy Claude Nininahazwe.

Tubandanije nano makuru twabateguriye , haravurwa itangwa ry’ibiturire ku ba polisi bakorera ku gituro c’Imiduga kiri  ahahoze hari isoko nkuru ya Bujumbura. Abanyagihugu bakoresha ico gituro mu kwiyunguruza , bidoga bavugako bashobora kumara amasaha agera ku ndwi barindiriye Imodoka ; eka ngo niyo hagize iyiboneka ngo habanza kwurizwa ababa bagize ico

Arakoze Claude Manirakiza , Ishirahamwe PARCEM ryishinze gukangurira abarundi guhindura ingendo kugira bashike kw’iterambere rirama riratewe umutima uhagaze n’igiturire gisa n’iciminogoje mu Burundi . Ishirahamwe mpuzamakungu rigwanya igiturire Transparency International mu matohoza riherutse gukora , ryasanze Uburundi ari igihugu kigira 48 mu bihugu vya Afrika bibangamiwe n’igiturire. Ishirahamwe PARCEM ribonako ico kibanza kibi c’Uburundi kiva ahanini mu kunyonora amatungo ya leta , kugira ubutunzi budaciye mu muco  n’ibindi n’ibindi. Ivyo vyose nivyo bituma ubukene buca bwiyongera mu banyagihugu nkuko bisigugwa na Faustin Ndikumana arongoye ishirahamwe PARCEM.

Faustin Ndikumana abonako kugirango igiturire kiranduranwe n’imizi mu Burundi , aruko leta yokomeza amategeko akigwanya, hanyuma ikanarushirizaho guhimiriza abanyagihugu kukigwanya . Dusubire tumwumvirize.

Uwo yari Faustin Ndikumana umuyobozi w’ishirahamwe PARCEM , akaba ari no ngaho hagarukiye amakuru mu kirundi twari twabateguriye , mwakoze mwebwe mwese mwayakurikiranye , bakoze na bagenzanje bamfashije kuyatororokanye, mugire aho muba mwubahwe, nahubutaha.