Umuntu umwe yarapfuye arashwe urusase mu mishamirano yabaye hagati y’igipolisi n’abunguruza abantu ku ma pikipiki. Ivyo vyabaye kuri uno wa kabiri ku mutumba Mukubano uri muri komine ya Nyanza Lac mu ntara ya Makamba mu gihe abo bapolisi bariko bakurikirana umwe muri abo bashoferi , bamwagirize kuba yapakiye birengeje. Abo bagendesha amamoto bagiriza abapolisi gutwazumukazo mu kazi kabo
Mumakuru ajanye n’itangwa ry,ibitoro, aka mwana wa mama n’ibiturire, ubu ni vyo bisigaye biranga ahanini ugutanga igitoro, iyo kiramutse kibonetse mu gisagara ca Bujumbura. Abatwara imodoka n’amapikipiki bavuga ko ariko ama stasiyo yose atigenza kumwe, bagatanga uturorero tw’izo usanga mwo akajagari, aho abitwa abakomisyoneri aribo batora imodoka zihabwa igitoro, n’ahandi usanga abahakorera bavyifata mwo rugabo.
Dutandukire igisata kijanye n,amagara y,abakozi ba leta.Imyidogo ni myinshi mu banywanyi b’ishirahamwe rivuza abakozi ba Leta « mutuelle de la fonction publique » mu kinyamazuru. Abo banywanyi bavuga ko iyo bagiye gutora imiti mu ma pharmacies babwirwa ko ata miti ihari canke ngo imiti runaka ntija kuri mutuelle. Aho bigeze basigaye basaba kudasubira gukatwa amafaranga ku mushahara ajanwa muri mituelle, bakaja mu yandi mashirahamwe avuza abanyagihugu.
