Mwiriwe ncuti namwe bakunzi ba radio Inzamba agateka kawe kaze mumakuru yo kuruyu wa kane igenekerezo rya 13 Ntwarante umwaka wi 2025. Aya twabateguriye tuyahera kungingo nkuru nkuru ziyagize

• Uburongozi bw’ihinguriro ry’icayi ryi Tora muri commune Mugamba buragirizwa kugurisha icayi bidakurikije amategeko. Abakozi biryo hinguriro badomako urutoke uwujejwe ubudandanji kwiha uburenganzira bwo kukigurisha i Mombasa biciye k’umudandaza wo mugisgaraca Bujumbura. muraza kuvyumva
• Mugisata c’indero naho, Abanyeshure barenga 500 nibo bahevye ishure mugice cambere cuyu mwaka muri commune Gashikanwa y’intara ya Ngozi. Imvo yavyose ngo n’ubukene burangwa mumiryango. Abajejwe intwaro n’indero bakaba batanguje igikorwa co guhimiriza ku kamaro k’ishure
• Abarimyi nabo bo muma communes ya Kibago na Mabanda y’intara ya Makamba bafise ubwoba bwinshi ko amapfa ashobora gutera muriyo ntara kuko hamaze igihe haka uruzuba rwinshi. Bakavuga ko imirima myinshi yatanguye kuma kubera urwo ruzuba. Kaze mwese

Ndasubiye kubaramutsa mwese

Abakozi bo mw’ihinguriro ry’icayi i Tora muri komine Mugamba mu ntara ya Bururi baridogera abarongoye iryo hinguriro babagiriza kugurisha icayi bidakurikije amategeko. Bavuga ko amakamyo yuzuye icayi agitwara i Mombasa mu gihugu ca Kenya kukigurishirizayo. Bagiriza uwurongoye igisata c’ubudandaji mur’iryo hinguriro kwiha uburenganzira bwo kukigurisha n’umuntu aba i Bujumbura, ari na we ngo aca aja kukidandaza i Mombassa mu gihe ico gikorwa cahora gikorwa na OTB ivyo babona ari ubusuma bushasha bwadudutse, iyi nkuru tuyibaze Audace Nimbona

Arakoze Audace Nimbona

Tubandanye mugisata c’indero

Abanyeshuli 536 nibo bahevye ishuli mu gice ca mbere c’uwu mwaka w’ishuli w’i 2024 ushira uw’i 2025 muri komine Gashikanwa iri mu ntara ya Ngozi. Imvo nyamukuru ngo n’ubukene bwugarije imiryango. Abategesti bajejwe indero n’abajejwe intwaro muri iyo komine , ngo bariko barakora uko bashoboye ngo batorere inyishu ico kibazo , mu guhimiriza abavyeyi n’abana ku vyerekeye akamaro k’inyigisho. Ni inkuru ya Eddy Claude Nininahazwe

Radio inzamba turabandanya ayo twabateguriye

Abanyagihugu bo k’umutumba Rutundwe ya zone Kiryama y’intara ya Bururi baridogera uwutwara uwo mutumba ko agurisha ibinyobwa vya Brarudi kugiciro c’umurengera. Ikibabaza abo banyagihugu nuko ku mitumba itandatu yose igize zone kiryama ibiciro vyadugijwe kugiciro c’umurengera biturutse kuruyo arongoye umutumba Rutundwe. Ido n’ido na Pacifique Nkeshimana

Mugisata c’uburimyi naho

Amakenga ni yose mubarimyi bo ma  komine Mabanda na Kibago muntara ya Makamba. Bafise ubwoba ko umwimbu utazogenda neza biturutse kuruzuba rwinshi rumaze iminsi rwaka murizo commune. N’inkuru ya jean Baptiste Bireha.

Arakenuye jean Baptiste Bireha

Imbere yo gusozera aya makuru

Mukurikire

Akamo k’ishirahamwe Focode mu ntumbero y’ugukebura kubijanye n’ipfungwa ry’agateganyo

Ni ngaha duciye dusozerera amakuru twariko turabashikiriza, mwakoze mwebwe mwese mwayakuri